Home Aitorma Jorani Kok Laibuma Tai Kebeng Mung No Bataiwi Kasawi Phai Jak Kokborok Toke Haphar...

Laibuma Tai Kebeng Mung No Bataiwi Kasawi Phai Jak Kokborok Toke Haphar Ni Phaiching Mokol Rwlaima

0
79

By Aloy Deb BARMA

Tripura wngkha India bising ni salgra salka (north east) bai khobjak kaisa haste. Aro tongo belai kuchuk kuk hukumu mukumu, ra bisi ni simino aborok khatijak tai palaijagwi tongo. Aah hukumu mukumu ni dal bidal phaiching ni bisingo kaisa wngkha kokborok toke hapar (Film Industry). Aboni bisingtwi Tripura ni hukumu rok ni mangpili tisawi  phunuk thani choyawi saktharwi tongo.  Kokborok toke hapar(Film Industry), kaisa Tripuri film industry hinwi bo sini jagwi tongo. Bharat haktor ni salgra salka bai ni kaisa kwtal tai kaswkang industry. Kokborok wngkha Tripura o yaphanng ni simi tongwi tongnai rok ni bisingo khobjak kaisa dopha ni mani kok. Borok no, bisi ra kainwi kaitham romwi borok ni toke hapar (Film Industry) tai manjumung no bollywood ni kwcham tai kaham hamya bebakno pharsawi, salgra salka ni naithok nukthok wansukmung rokno sai mani bisingtwi twidulwi phai tongo. Thwng nuk tai mwnwi kothok, thwng nuk bwsa tai documentary ni bising twi Kokborok toke swnam nai rok borok ni dophani romwi tisakha tai aboni logio aah amchaio yaphang ni simi tongwi tongnai rok ni kok, hukumu, halok tai dophano mwthang sawi awai khwlai nani samung tangwi tongo. Hayungo borok ni baithang ni kothoma rok bukhuk bai samani bisingtwi no komoryawi sajagwi phaio.

Kokborok toke hapharo kaisa laibuma tongo abo wngkha chichuku ra char chi bisini paithak phaichingo swnam jak mani chichuku ra charchi dok bisio “Longtwrai” mungwi puila karijak mani toke. Aboni yagulo tai kainwi kaitham toke bo swnamjak kha, kothoma sathani phan gwnang yarwng tongmani bai khasoton jagwi bolai jak kha.

Abo luku hamjakmung manmani bisingo phano, bataijaknai rok no laiwi thang kha wngtong jorao, aboni bisingo kainwi kaitham amchai juda khlaiwi nukjago. Cinema hall kwrwi tai kaham khe chabjakmung kwrwi no khobwi kainwi kaitham biyal ni bagwi kokborok toke haphar kwlwgo hinwi romwi mano. Rang chuba nai ni biyal, bokhong habanok kwmamung tai nai nai rok ni nukna muchung ma swlaijak ma bai baksa swnamwi tisanani phan kwrwi wngmano khobwi duda juda jwngjal ni bagwi toke hapar kwlwgo hinwi bwrwi mano. Aboni wngkhari no kuchuk berem ni toke swnamna chaitogwi choba khwlai tongo juda juda amchai ni toke swnam nai rok, hindi toke bai batai mannai hayung ni salsibai ni kotor tai lukuni hamjakma manjak toke hai salaijak na twi khlaiwi.

Toke haphar no twiwi rang chubachu khwlai nai rokno toke haphar kaisa ajina lama hwnwi hojak ni biyal wngmabai sukurubwi saimanya bai chubanai rokno soton nani choba khwlai lai matonglaio. Toke swnam nani tai baknani bagwi rang chubanai belai kheno nangkugo.

Aboni bagwi khom khom khlaiwi toke swnamnani phan manlaiya, tai nainai rokni kha supungwi mannatwi khlaiwi toke swnam nani chukya wnglai kha. Seb manya wngma bai toke swnam nai tai toke thwngnai rok haste yakarwi thangnani nangkha, baksa juda juda samung ni langmao kwrwng nani nangkha. Hasteo kainwi kaitham toke nai nok no karwi bebak nai nok no kwcham tai saktharwi mwthangwi narwk jakya. Toke swnam nai rok toke phunuk nani tai kokborok toke nainani bagwi kwbangkuk borok khlaiwi sotonwi manlaiya.

Digital persamani yagulo nainai tai khwnanai rok online streaming ni thai ni bwkhak thang baikha. Abo toke hapharo nainai rokno soton thani taibo bataijaknai wngwi bachakha. Aboni bagwi kokborok toke haphar bo jora bai baksa gwdalriwi tisanani nangkuk kha. Jora swlai jak mani logi logi kwtal khaiwi toke swnam mani raida no saiwi nahar nani nangnai, tai kwtal khaiwi toke nai nok rokno sotonwi mannatwi khlaiwi tisanani nangnai. Toke swnam nai rok kwtal manwi swnam thani kha marwnai , khom khom khlaiwi hukumu mukumu rok nainai rokni mokolo kwphanatwi khlaiwi. Haktor ni swnam mung tai hayungni toke rokni logio bataiwi hinnani choba khlai lai tongo.

Hasteo  morden toke nainok ni biyal tai multiplexes ni biyal abo 4k tai 3d hai kuchuk berem ni formats o phunuk nani bagwi nangkugo aborok ni biyal wngma bai toke swnam nai rok borok ni toke phunuk thani nainai rokno soton nani  belaino tugwi thango. Aah batai mung no batai laina bagwi haphang ni tai haphang ni phatar ni rang chubanai rok kokborok toke haphar ni bagwi thansa wngwi kaisa kaham tongboyar swnam nani nangkugo. Haphang toke swnamthani rang swbainai rokno kha bacharwna bagwi gosimung tai twitun lelamung bo riwi mano. Baothang swbainai rokno khatinung ni lama phunugwi swbaimani bisingtwi kiphilnani naharmung bai khabachariwi mano. Wngtong jorao toke nai nok rok kwtal khlai mung bai naithok khwlai sajogwi tisa jak khe bo tripura ni toke swnamnai rokni bagwi chakuganw. Abo bai nainai rokno soton na simiya amchai ni lukurok bo samung ni seb mananw. Jora swlaijak mani logi logi kokborok toke haphar no lukurok ni naina hamjakma no yachagwi naharwi toke swnam nani tamoni hnmale nainai rok ni sanmung taibo swlaijago, khatongthok jaknai, juda juda darma ni, chongjaknai tai siyan bangjak nai toke rok naina hamjago. Je phuru nangmani sai kwbang khlai na naio aphuru nukthok ya rokno phano swnam nani thanglaio. Phiya abohairokno sapul mani bisingo phano hukumu mukumu ni yarwng no mokol khurina twi kheno toke swnam nani nangnai. Aborok khwlai manna hwnkhe toke thwng nai, toke tisanani tai manjumung no twiwi chasamung ni bwkhak kha ma warlai nai. Toke hapharo kwtal raida bai kothoma sanani sep kaichom na nang nai tai kwtal manwi, phunukmario tongo special effect tai chaitok na nangnai. Toke no laiphwlaiya twi khlaiwi kwtal media bai koboljakya khe yok nani nangnai. Hoda manjumung ni thai tai juda juda digital manjumung twi, nainai rok bai kwrwng gwi haktor ni toke tai toke swnam nai bainwi no nugwi mannatwi, mung manwi, samung khwlaiwi tongmani kobok ganw.

kokborok toke haphar wngtong jorao satok jagwi tongmani kubui kok phano, abono mwthangwi tisanani bisi jora nangliya. Soi khlaiwi swbaimung tai chablaimung tai thunu mani bising twi batai mungno laiwi mano tai phan gwnang toke haphar ni lekhamungo kasawi mano. Samung ni seb khlaiwi, ticket phalwi tai juda juda samung ni bisingtwi haste ni rang raida nobo chasariwi mano toke haphar ni haphang ni tai haphang ni phatar ni rang swbai nairok kwtal manjumung ni wngkhari no yachagwi naharwi kaham tongboyar swnamwi kokborok toke swnam nai rokno bangrwnani tai chasamung ni bagwi kha bachariwi mano. Borokni phan kwrak hukumu mukumu rok no romwi tisa nani tai Bharot ni kotor toke o borom mannani tai sinimung manwi sakni haktor sanwi mannani, abo aphuru no wngwi mano, swnam mung ni dadak sidak bataimung rokno batai nani bagwi nangkuk mani yapiri jephuru nahar jaganw.

Aloy Deb Barma,
Film Scholar

NO COMMENTS

Leave a Reply

%d bloggers like this: