Nok kuridok nokdok, chalai kuridok chalaidok kami kotoro randijwkmani nokbo aro noksa. Bigra-khangra, nok chilaphila bwsla songdari suchunotwi bini nukhung. Kami kotorni bisingo bini nokno nokbaching. Kamini kebo randijwkmano yagul twinaibo kwrwi, mungsao chubanaibo kwrwi, naisonai kwrwi, gwdalnai kwrwi, kebo bono kamini borok hwnwi chernaibo kwrwi. Kamini chokdrinobo randijwkma salsa phano chuak yakhuri khwlaibo manliya. Chokdribo bini kokno muituno manjakya. Omohaikheno bisi thango bisi kiphilo randijwk-mani langma. Salsa machao salsa machaya khlaimangno bisi kwdwkma laikha. Jemantwikhe sakni thwino chwranwi ajiwi guniwi sajla songdarisano oksok-twi sokya-twikhe charwi pusiwi, tabuk songdarisa sikla thangsiya wngkha.
Randijwkmano nainani hawang kwrwikha, chenglai sokhlai bukur hoichajak, bekreng kurung karang, shir rwdang rwdang khlaiwi khwnai cheng-khru rabjak. Bini bumungno kirima singsa twmabo kaisa wngjak. Songdarisa twrwk twrwk khasiwi uansukna sikha. Bumani halok tei nokni halokno nugui khayogwi muktwi kosorjak. Kamini borokbo kebo bohrokno naharnai kwrwi tei gwdalnaibo kwrwi. Bohrok simino buibai judakhe khakjak, kamini borok bodol bodol khwlai yagul khilwi samung tanglaio, wase wareng khlai panda khlaio, thanglai phailai wnglaio tei berailaio. Bohrok khe mungsao duljakya tei khobnabo naiya.
Omotwirokno nugui uansugwi songdarisa salsa bumano hwnkha, tamoni bagwi omohai wngna kwlaikha hwnwi. Randijwkma sawi khwna rwkha bini kwpal birmanni kothomarokno. Bigra khangra chaiya chukya buibai baksa tongwi manya, thangwi manya, nwphabo nwng chwrai ono thwipaikha hwnkheba kebo saknangya kwrwikha, nangya naharnai kwrwikha hwnkheba haino noksa khikwlai tonjakha.
Tei tamokhlainasa babu haino kwpalno simino uansugui ma tongkhata hwnwi bwsala song-darisano yaphang mariwi sawi khwna rwkha.
Bumani kwpal kothoma khwnama ulo songdarisa bumano sakha, ama ta uanadi je wngkha aswkno wngkha. Ang tabuk sikla sogkha, phan sogkha, chwng taklai huk chasinai, thangdi kamini chokdrino huk khlai chana bagwi bolong kisa sanwidi tei aboni logi ano dah khungsa jesekhephano ajiwi rwdi. Ang taklai jese-khlaiphano huk khlaisinaino hwnwi buma randijwk bwslani kokno kha kochomjakya wngwi sakha, babu angbo chukliya nwngbo aswk phansok chukya, bolong sanwi khlaimanyakhe teibose birman nanganw. Aphru-khe kamio phanose ma tongna kok tuganw. Kokno khwnayawi songdarisa teibose jalukma thakphlailiya.
Paithago tongwi manliya, salsa randijwk chokdrini nogo thangwi manoma swngwikha. Chokdri randijwkmani kokno khwnawi ha kisilwi mwnwi paigrakha. Ulokhe sakha, nwngda huk khwlaiwi chanani? Nini o sak-mangno twiwi? Nwngba tamo imang da koroiphai, haiyakheba twima da manjagwi phai hwnwi jatre- potre hwnwi kutugwi paijakha. Kamini borokrok huk alem chana bagwi janija ari bagwi phaiwi jono uaisa yagul khonsogwi phaibaikha, nwngkhe tabukse huk chana muitu wngo? Haikheno damorok simorok khwlaiwi thesekra bisikra khlai sawi rohorkha. Thangdi nwng aswk taklai huk khlai chana muchungkhe o kami sakani haphung songdari swkwiduk bwlwngno swbai mankheba, huk khwlai chadi hwnwi sakha.
Randijwkma chokdrini kokno khwnawi uaisano nokha baiwi kwlaijakmaswk wngjagwi thang-kha. Tamoni hwnba jehaphungno huk chadi hwnkha, abo yang-maising kokliya, imangni kok-haise. Ah haphung songdari swkwiduk bwlwng abo bwswk jorani kwcham, Bakotosongni saiphano okra abo. Swkwiduk mangse hapung rujujak songsa songsani yaphang tormase birphang yaphangbai baksa wngwi tongbaikha. Hapungthai kwlaibo, chekab kunchihai theng theng kepleng. Naisakhe khorokni pakurise kwlaima thango, teibose yaphang khumtengwi twisa kitingjak. Hayungni jeswk phan-gwnang phanno bono swbai huk chawi mannai tongwlak. Randi-jwkma haino siring khwlai khorok bomwi khapang dusawi kutulwi ma phaikha chokdrini nokni. Nogo phaiwi swrabsa haino borsai tongphaikha mwlang chawi. Bumani mwkhang ransajak nugui bwsala swngkha, ama tamo wngkha hwnwi. Randijwk bwslani mwkhang naisigwi kha khakamjagwi bukhuk begulu bagwlai wngwi muktwi phwrwi phwrwi kochogwi thangkha tei bebak kothomarok bwslano mariwi sawi khwna rwkha.
Buma randijwkmani kokno khwnawi saknangyawi mwnwi-suru suru wngwi bumano sakha, ama nwng ta uanadi jeswk kwcham swkwiduk bwlwng tei jeswk kuchuk kepeleng hathai se wngthwng ang bono swbaiwi takwlai huk chanaino chanai. Kami chokdri swbai huk chadi hwnkhabwle? hwnwi buma randino bwsla swngkha. Randi-jwkma sakha ao babu chadi hwnwi samato sakha, phiya abo bahaikhe mannaiba hwnwi imangni kokhai wngjakha. Songdarisa teiuaisa bumano saphiokha, ama nwng mungsa khlaina nangya ano dah simi jesakhephano khungsa rwgradi, aboni ulo naidi ang tamo khlai hwnwi. Dah khungsa rwdi hwnwi jalukmang jalukmang tongwi-manliya randijwkma paithago bwsla songdarisano dah khungsa ajiwino ma rwkha. Randijwkma kisaphano poitu thangjakya bwslani kokno. Sachugwi naikha buchirwi manliya. Imango tongma haikheno bwsla songdarisano chaya karwi dah khungsa paiwi marwkha thamchi kasamani bisingtwino.
Yango songdarisa khebo yago dah khungsa manmani teini salni simikhe aichuk bachawi bolongo thango, sanja lobsawi nogo kiphilo. Dipor jorabo hwnyakheno hatibarsa laikha. Buma randikhe bolong hoku hwnwi kisaphano poitu thangjakya. Boh khe uansugo bolongo thangwi dahbai tangphiningwi thwngna bagwise ongkhorna hwnwi. Tamoni hwnmale kamini bini sakchalai rokbo kebo bobai gwdalnai kwrwi tei thwngna logisongbo kwrwini bagwino dahno logisong swnam-khna hwnwi uansugwi jora jorao jolijago tei jora jorao kheba khabo khairokjago wngwi tongo. Randi-jwkma haikheno bwkhao wao sukrugo wngwi tongo.
Songdarisa buphru phai buphru thang kamini borok kebo saimannai kwrwi tei bohrok takwlai huk chana naio abo bo kebophano uansuknai kwrwi. Chokdri kheba huk chana bolong sanjakha aswkno saimano tei jehapungno huk chadi hwnwi dagikha, abokhe imangni kokse. Haikhe chokdribo imangphano uansukya Randijwkma huk khlai chanani kokno.
Buini kokno tamo sanani buma randijwkmase poitu chagraya bwslano. Aichugo buphru ongkhorthang sachwlap marwk-ya o salsaphano, sanja jora simino nogo haphaima nugo. Haikhe mangno hatibarsa laithangkha. Salsakhe phung aisiri siri songdarisa bumano sakha imang-ni kok haikheno, ama tini himdi ani bolong hokmani bahai wngkha nailaigrana, bebakno hogwi khiklai rwbaigrakha. O kokno khwnawi randijwkma bwsla songdarisano kahamkhe swngpi-ningwi naikha, ulokhe kisisa poito charuru wngjakha tei bwsla songdarisa bai thangwi nailaikha a imangni hapung songdarino. Randijwkma nugwi uanajakmani, haino swrabsa mwlangchai kok kuk saliya, bwsla songdarino uaisa naisigo tei bolong hokjak hapung songdarino uaisa naisigo wngwi tongkha. Randijwkma hapung songdarino sinikoroise thang-jakha. Aswkni buphang kotor kotor, aswkni swkwiduk bosong kotor kotor hapung songdarino kobolwi kuphung gerebsai tongmani, tabukhe bebak hogwi khiklai jakmang. Swrwng sw-rwngni phlang phlang wngjak. Randi jwkma uanajakmani khugo kok thaisaphano nongkhorjakliya. Uansukmang uansukmang sw-rapsa joratwi borsaino thang-rakha bwsla song darisaba tamo mwtai ataida wngkhwna hwn-wi. Haino munui-su kosongle abo-no aswk laitesa-khe hogwi man-nani kokya. Randijwkma ulta kirisoro sorose wngjakha bwslani omohai kirima sincha samungno nugwi.
Songdarisa bumano swngo, tamoni haikhe aswk borsai uansukha hwnwi. Randijwkma thorsa sundrujagwi wngyamasi khe sakha, mungsa wngya babu uansugwi manya omohai wnganw, ani joratwikhe imangno mwkthang wngjakhata babu hwnwi khani khulasa hamari rwkha bwsla songdarisano. Hapung guriwi berai naibaiwi khatwtwng wngjakha Randi jwkma. Bwsla songdarisano sakha, wngkha babu kahamno wngkha, achaima ulo aswk bisi kolokma huk chaiphaikha omohai bolong hokthani yapai milik ang nukyakho, tabukno nini omono puila nukha. Hambai belaikheno nono hambai. Babu omohai kheno uansugwi manya samung-no tangwi mwsa mayungni mwkhang manwi holong twibukni omor manwi tongdi. Babu ang tabukle khathonwi mankha kwpal birman swlaijaksinai hwnwi tongthok jagwi muktwi choroi-jakha. Aboni ulo bwsla song-darisano sakha, babu akon tabuk himsidi uacheng thwiwi ransa-grathwng, joratwi huk sogwi, joratwino huk rugwi hatalo maichilwi khiklainai hwnwi bwsla
songdarisano phikung buthepkha.
Songdarisa khaswrangjakha buma randini mwnwima tei khatungma nugwi. Haikheno songdarisabai Randijwkma thinango bohrokni langmani kaisa pohorni mari manwi khatung khajakhe nogo kiphilwi thang laikha tei bolong uacheng thwinani jorano naisingwi tonglaikha jorani samungno jorao painani bagwi.
Tei khakcha bwskangni talo…
–Ruhi Ch. Debbarma.
