Kokthai ‘Jatra’ ni kokmung hwnke thanglaimung eba beraimung. Kokmwsa (Jatra) phunukjago damtham ni simi dambrwi jora, tei boni uklogo tongo kol tamlaimung rokbo. Koklopmung, rwchapmung, mwsamung, mwnwikothok tei bulailaimungrok baikhe Kokmwsa (Jatra) ni kothoma sajugwi phunukjago. Kokmwsa(Jatra) phunukjago mwsakholao eba nokhla kotormao. Hor phasingmangno Kokmwsa(Jatra) phunukjago tei hor gwlang jorabo phunukjago. Agi puilao chwla no bwrwi snamui bwrwini mwsamung mwsao. Ulo 19 century ni simi hwnke bwrwibai chwla thansakheno mwsamung mwsalaina chengkha. Kwcham swijak bijaprokni kothoma romwi eba sakni swijak kwtal kothoma rokbai Kokmwsa(Jatra) mwsajago.
Puilao kokborok sanairokni thani Kokmwsa(Jatra) tubujakha Bengalni jatra mwsamung kwrwngrokni yak romwi. Puilao Tripurani bubagrarok jatra mwsamung chengkha tei bohrok borokrokni bwskango tubukha. Swkango Kokmwsa (Jatra) mwsamungrok nayo bubagra tei bini sangrongrok simino. Bugrakhor (Rajbari) ni bisingo simino jatra mwsamung phunukjago. Haiphano ulo Bugrakhor (Rajbari) ni phatar obo phunukjakna chengkha, tei aphuruni simi joto lukuni borokrok Kokmwsa (Jatra) mwsamungno nawoi tongthoklaina chengkha.
Mwsakholao mwsamung
khainani rwngmung tongmani bai kokborok sanai borokrokbo “Tripura Janasikhsha Samiti” movementni jorao sakni kokthaibai Kokmwsani (Jatra) kothoma swina chenglaikha. Sudhanya Debbarma bai swijak “Agiya Cholo” wngkha kokborok ni puila kokmwsa. Aboni ulo 1973 bisio kokborok Sahitya Sabha tikhlaikha “Lamani Homchang”, boni swimung tei direction rwkha Alindab Tripura. Bisi 1970 ni simi kwbangma bosong kokmwsa phunuk laina chengkha teibo kwtal tongdal, pungmung tei khorangrok bai. Aa jorao kwbangkhe luku hamjakmung mankha Thwi Phuta, Somaj Khiphildi tei Yamorok. Thwi Phutao mwsamani bagwi kol kwrwng tei mwsakwrwng Hemanta Jamatia belaikheno luku hamjakmung mankha tei bono yakpai rwjakha Sahitya Academy bai.
Nanda Kumar Debbarma bai swijak “Nobar Domsani Kothoma” no Kokborok Sahitya Sabha tikhlaikha 1983 bisio. Borok ‘Kokborok Drama Festival’ panda songchakha 1988 bisi o tei aboni bisingtwi kwbangma kokmwsa bodolrok kwtal tei teibo kaham kokmwsa kwrwngrok nongkhor kha. Kokborok Sahitya Sabha, Nanda Kumar Debbarma ni “Kwplai” tikhlaikha 1989 bisio.
Tei kaisa mwsakwrwng bodol Lampra, bohrokni puila mwsamung chengkha “Chamri Ompa” bai 1990 bisio. 1995 bisi ni Yatra Utsavo Lampra bodol puila yakpai mankha kokmwsa “Chethuang” phunugwi. Tiyari bodolni songchanai wngkha Ruhi Debbarma, tei bini yak romwi o bodol kwbangma yakpairok ajikha. Aboni ulo borok teibo kwbangma kokmwsamung tikhlaimanirok hwnke Swkal, Kuchuk Kherembar, Kuchuk Ha-Sikamrok. Kokmwsa bodol Sampli Theatre Centre chengkha 1997 bisio, tei jora kisani bisingono borok belai kaham kokmwsarok phunukha, buborok wngkha Rung, Imangni Bwsarok, Longtoraini Eklobyo. Aoli phatarni kokmwsa bodolrok wngkha Mandaini Khorang bodol tei Abhicharan Bazarni Dugmali Cultural Troups bodolrok.
Kokborokni komwsamung belaikheno luku hamjakmung mankha aolini phataro. Kaham swijak kothomani bising bising Hindi tokey hai kothomano tolwi bo Kokmwsa (Jatra) mwsajakna chengkha. Jamatia amchaini bodolrok sinijakha borokni koktang khwnatok tei kwtal tongdal khe solaina rwngmani bagwi. Tripurani achaiphang khorangno yakarwi borok Hindi tokeyni khorangrokno sollaiwoi kokborok kokthai tei kwtal pungmungrok bai khe rwchapna chenglaikha, lukurok bo obono kha bai dulwino chajaklaikha. Hindi tokeyno swrwnglai swnamjak kokmwsamungrok wngkha “Thwini Bodla thwi” tei teibo kwbangma.
By Angshumoy Debbarma
