Malmatani bo sinimung tongo, buphang uaphangni bo sinimung tongo tei
langma gwnangrokni bere jottoni kuchugo tongnai borok munuisuni le teibo
juda khe sinimung rwjak tongo. Romdi bini kanmung chummung, kok, hukumu
mukumugrokbai.
Nainaikhe o sinimungrokno twiwino chwng borok bai borok kami khalaio
tei nukhung khalaio aboni ulo dopha khajagwi kusung kusung dophani thinag
manjujago. Tabuk dophani a sinimungo jwngjal kwphamano chwng jottono
sio. Dophani thinang langma kesepjak hwnwi saimanwi bo aboni yokna
lama swnamyawi chwng jottono sak pherwi tongwi manya. Tamoni hwnba
dopha saichung bai khajakya tei saichungbo chwng tongrwkya.
Hakhe phaidi a jwngjalrok dophano bo jaga kwsa charwi tongkha abono
yakakna lama chaitoklaiyanw. Phiya o kok salaina thangkheno khnathokya
kokrokno phano sana kwlaio.
Romdi chini dophani talikhani kokrokno koktang tei kokrwaibai phano
swilaiyanw hwnwi baksa baksa saktharwi swimano pirlai khe chini yarwng
rago hwnwi saimanphano tamoni bagwi tabukbo baksa sak pherjak?
Swidi hwnkhele yak kwlwijak, sadi hwnkhe le bwswlai buljak, poridi
hwnkhe khuk korojak, pirdi hwnkhe lachi kodrojak, khatidi hwnkhe khoraijak.
Sanathangkhe chana mai tong khe tei tongna nok kaham tongkhe, buini
bohok kapma le khwnanai bahai khe? Aboni bagwino dopha le chwngno
ringwi tongo sakni sinimung narwkdi dophani thinang manjudi. Tongna
rwngya tong kwmatwi ta wngdi hwnwi. Hambai.
By Binod Debbarma, Editor
