Nwngmani twi chini nukhungkhamani bisingo kaisa kotor manwi. Borokrok twi kurwikhe kwdwk sal thangmaya.
Tripura State Public Works Tangkhortni kaisa bedek, ‘Drinking Water & Sanitation’ hwnwi tongmani twi boroni man tei omono tuiwi joto samungrokno khwlaina barja manjak. ‘Ministry of Rural Development’, Govt. of Indiani Department of Drinking Water supplyni Rajiv Gandhi National Drinking Water Mission bai naikoljak National Rural Drnking Water Programmeni 90% rang bai o samungrokno khwlaijagwi tongo tei State Govt.bo rang rwwi tongo.
Rajiv Gandhi National Drinking Water Missionni raidao tongo kamini joto borokrokno kaham twi rwnani nango. Chwng jotono saimano twi manthogo ha tolao,tei ha bai nangjak twisa, twima twirukungrogo. phiyaba chwng o manthokma twirokno bwswk samungo phwnang man tei o ha tolani, tei sakani twirok bangwi da tong ebakhe pawi da tong, Borokrok hasteo belaikhe bangwi tongkha. O hasteo Nwi/Tham ( 2/3rd ) no tui phiyaba twi kaham begului 0.002% se. O hasteo jotoni swlai twino samungo phnangjago. Irrigationni bagwi tei gilama Industry bo nwngma twini nanggo. Phiyaba chini kotor kotor Scientistrog saklaiwi tonikha o hasteo tei 15-20 bisini ulo kaham twini biyal wngnai nai tongkha. Phaidi hwnkhe chwng twino jeswk samung nango aswkno phwnangnai. Nangya hwnke ma khatinai, chini chwrairokni bagwi, borokni kolok salo twino manthokrwi bagwi.
Ha tolani Twini yaphang rog:-
a) Ring Well/ Brick Masonry /RCC Well: – Ha tolao 30 ni simi 60 feet rogni bisingono kuao twi manthogo. Abo hai twi chini kami amchairogo gilama nugwi tongo, tei twi manthokma jagao hakor kiting khwlaibo Kua rokni twi nwnglaio.
b) Ordinary Hand Pump (OHP):- Abo kaisa mechanical yaphang. Abobai ha tolao 60 ni simi 100 feetrokni bising twimanno. O OHP bai chikon Motor phwnangwi twi tanky saka rogo tisai mano. OHP nokrogni bagwi belai kaham.
c) Mark-II/III: – Abobo kaisa mechanical yaphang. Abobai ha tolao 180 ni simi 300 feet rogni bisingo twi manthogo.
d) Small Bore Deep Tube Well (SBDTW):- Abobo kaisa phlik bai chalogjaknai yaphang. Abo ha tolao 200 ni simi 400 feetni bisingo twi manthogo. O yaphango 2/3 HP Motor phwnangwi 1.00- 2.00 km chikon sumuni mari khaimano. O yaphango kaisa phase phlikni connection tei 180-200Voltage nango.
e) Deep Tube Well (DTW):- Abobo kaisa phlik bai ma chalogjaknai yaphang. Abobai ha tolao 500 ni simi 1500 feetni bisingo twi manthogo. yaphango 5/10/15/20 HP Motor phwnangwi 2.00- 5.00 km pipe line khwlaimano.yaphango kaitham phase phlikni connection tei 380-400Voltage nango.
f) Yaphang twini treatment plant: – Abo hwnkhe twisarokni Twino naharwi treatment khwlai pipe line bai yaktuma rohor rwo. Tabuk twi bisi wngtwi,twisarokni twi biyalni bagwi abohai samung bwtang khwlaijaklia.
O kua, OHP tei Mark-II/III rok chini kami amchairogo belaikheno nangkugo. Tamoni hwnba aborokni bagwi phlik bo nangya.
NRDWPni yaktolma mario joto SBDTW/DTW ni bagwi User Tang Bodol khana nango. SBDTW ni bagwiUser Tang Bodolni khoroksani bumungtwi phlik connection ma nahar nai tei tokhuk bo beneficiariesrokno ma rwo. O tokhuk rijakyani bagwi chini kami amchairogo kwbangma SBDTW yaphang rok gothokya wngwi tongo. Phiyaba baksa User Tang Bodol rokni bagwi belai kahamkhe gothokgwibo tongo. Tabuk jora DTW phlikni bill DWS Tang khor rokno rwwi tongkho. Twi Kaham: – Twi no chwng kahamkhe nwngnanango jephruru twio biological contamination (Cholera, typhoid, guinea warm etc.) kwrwi tei chemical contamination (kubang Iron, arsenic, nitrates, fluoride etc.) timeni bisingo tongnai. Nwngmani twi rogni yaphangrokno bisi brumbrum uaisa chemical contamination tei uainwi khe bacteriological contamination chanai naina nango. DWS tangkhorrok.
tabuk borokni office karwi hauar chahnai manwi (FTK) rok kami milo rwi tongo Yapri swkang chahnai khwlaina bagwi. Chini Twipra hao nungmani twini yaphangrogo belai iron gungra muchung paijak nukjago. Tangkhorrok iron Removal plan bai iron norwi tongo. Chini Twipra hao tabukbo baksa bisingni kamirogo Twi ganao manthokliani bagwi Twisa ganao kisa hakor khurwi Twi ma nahao. O Twi ogo bacteriological contamination belai tonglaimano. Tei kaisa nukjago chini indigenous borokrok Filter use khwlaiya tamoni saimaya.Twiprao manthokmanai Tripura ma de carbon Filter belai kaham technology hwnwimano tei rang bo kwbang nangya.
Hwngkhe chwng phaidi paithago Twino kahamkhe ma sinilainai. Twi thopsabo samungo nango tei twino jesuk samung nango aswkno phwnangna nago. Chwng twi o ma khatilainai chini thinangwi bagwi.
By Er. Jiban Debbarma
