Tripura hasteni khuk kwtwi rwchapkwrwng tai mwsakwrwng Rumi Murasing bai direction khaijak kwtal music video ‘Manliya Tongwi’, Bharat Hakotor tai Bangladesh haa ni kokborok Sanai tai khwnanairokni bwkhao tongthokmung tai holokni nokbar sibsawi rwkha kwbangma borokrokni bwkhao. Bangladesh Khagrachhari ni Actor Liyon Tripura Rumi Murasingni co-actor wngwi samung khaikha ‘Manliya Tongwi’ music video o. Shooting, location tai direction rokno saimanna bagwi Aitorma Kokborok Monthly magazine ni wngwi Angshu Debbarma koklam panda narakha Rumi Murasing bai…
Aitorma: Bangladesh haa o thangwi shooting khainani wansukmung puila bahaikhe phaikha?
Rumi: Hambai Aitorma monthly Magazine ni adong song no, ano o jora rwmani bagwi , ani kok thainwi thaitham share khai nani sep rwmani. Kwdukma sal eba kwdwkma bisi swkang ang waisa buisu festival ni bagwi Bangladesh o cultural exchange hai program ma khaikha. Aboni swkang ang agi sai manya je aro Tiprasarok tongo hwnwi, aro thangmani ulo se sai mano aro kwbangma tongo hwnwi. Borokbai tongwi bohrok ni hospitality rok nugwi belai chajakha, tai sana muchungo India ni tiprasa bai Bangla haa ni tiprasa bonding kaham wng nani nango. Aboni pore chwng tei bo thang kha 2-3 bar tai abo ni ulo teibo kaham khe saimankha aroni maya tongmungrok. Ayangni bohrok chaitogwi tongo o je ayangni tiprasa tei chini yang ni Tiprasa ni relation kwrak khwlai nani.
Hwnkhe ang wansogo je chini music industry ni bising twi bo kaisa yapri senani nango je oro ni Tiprasa bai ayang ni Tiprasa miliwui kaisa project khwlai kha hwnkhe tei bo bui sai man nai, je ayango bo Tiprasa tongo kwbangma Kokborok Sanai. Bangladesh Tipra kollansonshat tei bangladesh Tipra jubok-sonshat tei aro ni TSF bai miliui kaisa wansok lai kha music video production khainani bagwi. Angno puila proposal rwkha omo hai khe kaisa project khai khe bahai wng hwnui, tai ani kokno chajagwi bohrok ano financially tei kwbang-ma twi no chubakha tei bohrok ano help khai kha.
Aitorma: ‘Manliya Tongwi’ shooting ni Trip ni kok kisa saui khwnarwdi.
Rumi: Trip kaham no wngkha. Jephuru phano thangkhe ayang phasingni borokrok chubawo. Aboni bagwi mungsha jwngjal wngliya tai kahamno wngwi phaikha thangwi phaima. Chwng Agartala ni direct thangkha Dhaka. Dhaka ni simi Cox bazar o thangwi Bangladesh ni famous thaio shooting khaikha. Bangladesh o Tiprasa rok tongmani thai Khagrachhari o thangkha. Aroni kami o tongwikha tai kami ni borokrokbai samung khaikha. Ani logi Tripurani sogwikha famous artist tai videographer Krushal Reang, Cinematographer Hamshoukti Reang tai Make-up artist Himen Debbarma. Casting o actor tai juda juda role play khainairok jotono ayangni borokrokmang. Hwngkhe, trip ni kok sana thangkhe kolokma kok sabaimanya, kahambo tongo hamya bo tongo. Haiphano, maximum no kahamno wngwi phaikha hwnwi mano.
Aitorma: Shooting khaina thangwi tamo biyalrok phaikha?
Rumi: Shootingo problem face joto jagano khaio, oroni wngthwng ayangni wngthwng. Puila sanani thangkhe, Actor nibo omono puila shooting. Shooting ni swkang actor bai malaijakya. Shooting chengdrop phuru kisa problem wngphano ulo thik wngwi thangkha. Sana thangkhe actor kwtal phano, bo belai talented. Actor ni mung wngkha Liyon Tripura, bono je phwrwngmanirok dakti swrwngwi nai mano. Aboni bagwi actor no twiwi aswk problem wngliya. Haiphano, je location o shooting khaina thanglaikha, aro jotono first time sogwilaiyo. Swkang location nukya siniyani bagwi atumsa shooting khaina thangwi kisa misa problem o kwlailai kha. Kwtal artist rokbai samung khaina nangma bagwi, kisa co-ordination o problem phaikha. Tai shooting khai tongma jorao, yang nokni koktwma sogwikha je ani khachuksa ayung, Tripurani belaikhe famous koklop tai swikwrwng Chadrakanta Murasing o haa no yakarwi thangkha hwni. Shooting khai tongphuru o koktwma manwi ang kisa phano focus rwi manliya. Haiphano je manmani ang khaikha tai omohai jorao phano ang shooting pai phainani chaitokha. Sana kwlaiyo ayangni borokrokni kwbang chubamung tai logi manmani bagwino ang manage khai mankha.
Airtorma: ‘Manliya Tongwi’ Shooting ni samungo bwswk rang-puisa baikha?
Rumi: Shooting o bwswk rang-puisa swbaijakha abo ani aswk idea kwrwi. Tamni hwnkhe o project wngkha kaisa collaboration project, Bangla haa tai Tripura haa mililai khaimani. Joto shootingni rang-puija borokno barja narharkha. Tai Tripura hasteni team twlangmani budget hwnkhe ang rwkha. Borokni ayang bwswk rangpuisa baikha swngjakyani bagwi ang aswk saui manliya.
Aitorma: Nwng khoroksa rwchap kwrwng tai mwsakwrwngtwtwi Direction khainani bwswk hamjak?
Rumi: Khoroksa singer tai actor phano, ani puila music video ni simino ang direction khai phaijak. Puila ni music video rogo mililaino direct khailaimani bagwi, aphuruni simino kisa kisa swrwngwi phaikha. Tripura ni joto music video o no jotono mililai direction rwlayo, haiphano je kwbangkhuk direction rwnai bini mungno chwng mention khaio. Saksak nai nai swrwngmani tai pal baksa khailaimani no samungo phwnangna chaitokha. Direction khainani bo ang hamjago, abobo tongo kaisa reason. Acting khainani, Rwchapnani tai direction khaina muchungma tongmani bagwi no khaikha hwnwi mano.
Aitorma: Nini careerni kotorkhuk influencers rok sabo?
Rumi: Influence manmani kok sana thangkhe kwbangma borokni thanino influence mankha. Kwbangma borokni samungo, kwbangma borokni tongmungo, kwbangma borokni kogo influence wngo. Kebo khoroksa bai influence wngo hwnwi kwrwi.
Aitorma: Bangladesh ni borokrokni lamsokmungno bahaima tongkha?
Rumi: Bangladesh ni triprasa rokno twi sana thang khe, puilao ang same kok no sao, Bangladsh ni tiprasa rok , India ni tiprasa rokno aswk khe hamjakgo abo thang khe no sai manai, abono kok thai bai explain khai manya. Khiphil phuru nini mwktwi kwlainai asuk jora twi ang norok no saimano tamni hwnke jeswk bar ang thangkha aswk barno ang phirok phuru ani mwktwi kwlai sugo. Borok aswk khe hamjakgo, borok ni mokolo mwktwi nukha hwnke ani bo mwktwi ma faio amtwi hai khe situation wngui thango, aswk close wngwi thango, aswk khe bonding kwrak wngwi thango. Aroni borok rok belai khe unity kwrak. Aro tiprasani songkha kisa phano borokni unity kwrakni bagwi kahamkhe kungchugwi tongwi mano.
Aitorma: Kainwi hakotor ni bisingo nini music video bwswk joratwi sirisiti tai hukumu bonani khwtwng swngwi mankha?
Rumi: Achievment ni kok sana thangkhe, achievement wngya bo hwnwi manya. Haiphano, bwswk jora wngkha bo simi se saui manya. Just sana thangkhe omo se chengdrop, kaisa lama himdi hwnwi hogwi rwmahai, tai tabuk o lama twi joto borokno himwi mano. Kaisa borokni bokhrogo phairwi rwkha je kaisa lama tongo kainwi juda hakotor borokrokni bisingni contact tai bonding kwrak khainani hai lama phugwi rwjakha. Ang simi ya, phiya musician tai music director Swkang Debbarma bo o lama no phuwarnani chaitogwi tongo, tai omohai samung tangnani teibo borokrok kwbangkhe bwskango phaitwng. Yang tai ayangni borokrokni response manmani no tabuksak jora ni achievement.
Aitorma: Romantic scenes rokno karwi nini music video o traditional ni pholokmung bwswk jora khaimankha?
Rumi: Romantic scences rokno karwi ang borokni aroni culture no phunukna chaitok kha chikonsa music video ni bisingtwi. Borok buisu phuru mwtwi rwlaimani, buisu phuru mwsalaimani, borokni Goria mwsamung no ang phunukna chaitokha. Borokni culture tai mwtai rwmanirokno phunukmani bagwi borok belai chajakha. Chini India ni borokrokbo nukha chini yangni haino borokni yang bo mwtai rwlaio Goria phuru mwsalaio, jotono pal baksa mililai berailaio. Kha khaio ang kwbangkuk achievement manya phano 1-2% mankhwna. Omono ang ani bagwi kotor achievement hwnwi wansugo.
Aitorma: Nini co-actor ni bagwi tamo sana muchung?
Rumi: Ani co actor Liyon Tripura bo belai talented. Bono phwrwngkhe daktino mano. Bono samungo guide khainai tai logi rwnai tongkhe bo bwskango kuchukgo teibo kasanai. Kwtal ni bisingo sana thangkhe bo rwngmanino kwlaio. Phiya kwchar majar rogobo kwtal ni bagwi chwng aswk kaham khe connect wngwi manliya. Kaham khe chini bisingo connect wngnani kisa lerkha. Haiphano ulo smoothly kaham kheno samung kaham khai mankha.
Aitorma: Bwskango nini tamo project rok wngwi tong?
Rumi: Kwtal music video kaisa phai tongo. Abo Bangla hani location o shooting khaikha. Tai kisa Tripura ni location o bo khainani tongkho shooting. Aro ani co-actor wngkha Mithun Debbarma, chini Tripura ni belaikhe talented actor tai Mr. India Rubaru 2023. Bo bai ani omono puila samung, tai norokni bwskango dakti no tubui phunuknani chaitoknai. Hwnkhe nasingwi tongdi jotono.
Aitorma: Nini fans rokno tamo kok kwcharna muchung?
Rumi: Ang ani fans rokno obono sana muchungo je borokni chubachu, borokni hamjakmung, borokni support tongmani bagwi no tini ang je jaga phano sokphaikha khawi tongwi mano. Borok kwrwi khe ang kwrwi, borokni hamjakmung baise ang oro. Hwnkhe omo haikheno hamjagwi tong thwng, chubai tongthwng, omono naio ang. Borokni support tongkhe ang teibo bwskango akugwi manai, ang teibo samung khai manai. Norokni hamjakmung kupulwng ang teibo mana muchungo, norokni support teibo mana muchung. Hambai.
